دايم كنت بركز على العناية بالبشرة و الوجه ، بس.
العيون لها طبيعة مختلفة، لازم نعطي وقت و عناية للمنطقة اللي حوالين العيون . بالذات لان العيون و محيطها عنوان الصحة و الجمال .
هون هوريكم طريقتي في العناية بمحيط العين، المستحضرات اللي استخدمها و كم نقطة بسيطة راح تفرق معانا لما ننتبه عليها .
اول شي لازم نعرف انه طبقة الجلد اللي حول العين طبقة واحدة رقيقة مو مثل بقية الوجه اكثر من طبقة، و بالتالي شي طبيعي انه الوريد اللي بهالمنطقة يكون ظاهر، الغير طبيعي انه هالجلد يكون فيه اثار التعب و الارهاق و بالتالي بتكون المنطقة غامقة بزيادة .
منطقة محيط العين تعكس الصحة الداخلية للجسم ، تعكس الارهاق، قلة النوم، فقر الدم ، نقص الفيتامينات ، الجفاف و غيره ، عشان كذه اول خطوة للعناية بمحيط العين هو الاهتمام بالصحة .
و كمان استخدام الكمبيوتر و القراءة لانه هذا اجهاد لعضلات العين، فلازم نسوي فحص دوري للعيون كل ستة شهور و نسوي نظارة اذا نحتاج و نطلب تكون زجاجتها واقية من اشعة الكمبيوتر .
الاشياء المهمة اللي لازم تكون اسلوب حياة و تحافظ على صحة الجسم:
– شرب اقل شي 8 اكواب من الماء يوميا
– التقليل قدر الامكان من المنبهات و مصادر الكافيين مثل الشاي والقهوة و الكولا و غيره
– التقليل من الدهون
– اخذ كميات كافية من الخضار و الفواكه الطازجة
– النوم اقل شي 7 ساعات متواصلة و لازم يكون النوم بالليل ، نوم النهار ما يستفيد منه الجسم.
بعد ما نكون اهتمينا بصحتنا الداخلية ، و راح تعكس على جمال العين و صفائها و على صحة المنطقة المحيطة بالعين .
نبدا ننتظم على روتين العناية و هالروتين هو للعناية بالجلد
الخطوات اللي ليها مستحضرات بحط المستحضر اللي استخدمه حاليا و البدائل الممكنة له
اول شي لازم مرة باليوم عادة بالمساء و كجزء من روتين العناية بالوجه ننظف العين و مو شرط من المكياج بس ـ بنظفها من اثار الغبار و الكريمات و المكياج اذا حطينا ، طبعا لازم ننتبه الى انه لما نحط مكياج حول العين او كونسيلر و راح بعد كم من ساعة بتضل اثاره موجودة فلازم التنظيف . التنظيف بيكون بانك تحطي كم نقطة من المستحضر الخاص بتنظيف العين في قطنة و تمسحي برفق و عينيكي مغمضة.
حاليا استخدم هالمستحضر اسمه Jojoba Oil ، و مرتاحة عليه
– لما نيجي لخطوة ترطيب بشرة الوجه سواءا بالنهار او بالليل ما ننسى ترطيب محيط العين ، و هالمنطقة لها مستحضرات مخصصة لان مثل ما قلنا جلد حول العين يختلف عن جلد الويه .
ترطيب المنطقة هذه يتم بوضع قليل من الكريم او السيروم و بالطبطبة توزعينه من الداخل للخارج .
الان، كيف تختاري المستحضر المناسب للعين:
مستحضرات ترطيب العين تكون اما على هيئة سيروم او كريم ، الفرق بينهم :
– السيروم: اذا كانت بشرة منطقة العين تعاني من الانتفاخات و اذا كان الجلد دهني.
– الكريم : اذا كانت البشرة تميل للجفاف و معرضة للخطوط الرفيعة.
هنلاقي كم من مستحضر مكتوب عليه ضد الهالات او ضد الخطوط الرفيعة.
انا غالبا اختار المستحضر ذات الترطيب العالي يهمني انه احمي هالمنطقة من الجفاف ، حاليا استخدم سيروم العين من The Ordinary بستخدمه مرة بالصباح و مرة بالمساء.
و في كريمات زينة بعد مثل :
كلينيك Clinique all about eyes
clarins eye contour gel
اختاري اللي يناسبك.
طبعا منطقة العين تحتاج عناية اسبوعية مثل بشرة الوجه ، فاسوي لها روتين حلو و بسيط و يعطي استرخاء لعضلات العين.
بجيب ماء ورد بارد و بعد ما اكون نظفت المنطقة بمزيل المكياج و رطبتها ، احط ماء الورد بقطعتين من القطن و احط كل واحدة على عين و انا مغمضة عيوني و اخليها نص ساعة. هذا الموضوع بسويه مرة في الاسبوع.
نقطة صغننة بعد لازم ننتبه لها ، اذا بنحط كونسيلر او خافي عيوب يا ريت يكون مخصص لمنطقة العين . مثل غارنيه garneir eye roll استخدمه كجزء من روتين مكياجي اليومي.
و اكيد ما ننسى النظارة الشمسة لما نطلع و يفضل تكون مخصصة للحماية من اشعة الشمس ، مثل ما بنعرف الاشعة الضارة سبب كل مشاكل الجلد واكيد محيط العين لانه جلده حساس بزيادة.
بكذه غطيت اساسيات روتيني للعناية بمنطقة العين ـ اتمنى افادكم
الموضوع و بانتظار مشاركاتكم بافكار للعناية و الاهتمام بالعيون و اللي عندها استفسار حياها لا تتردد.
تحياتي
زهرة